الأحد، 23 يناير 2011

برافو

اخباركم ايه يا اصحابى وحشتونى كتيييييييييير جدا وبعتذر لو غيبت وقصرت  وماردتش على اى تدوينة من اللى انا متابعاهم بس انا بقراهم كلهم والله

هى تقريبا حاله عامة من الملل والزهق زى ماقالت صديقتنا علا فى اخر تدوينة ليها بتاعه المولد

ومازلت حالة الملل وعدم القدرة على الكلام دى مستمرة عندى فحبيت اكسرها بحاجة حلوة
حابة اقول برافو لبعض المدونين هنا واللى يستهلوها بجد
 زى ماقولتلكم قبل كده انا لست قصاصة او شاعرة ولكن ازعم ان عندى حس حلو ممكن اميز بيه الكلام الجميل اى كان نوعه

وعشان كده قررت انى ادى شهادة تقدير تفضل هنا فى ذاكرتى انا على الاقل لناس بجد كلامها جميل وبجد موهوبة

وللعلم ان كنت سوف اخص بمديحى اشخاص معينين فده مش معناه ان الباقى كتابته  ماعجبتنيش لا طبعا كل اللى ضايفه مدوانتهم عندى بجد موهوبين جدا لكن وبمنتهى البساطة دول كلامهم علق فى دماغى وفى اوقات لما بغمض عينيه بفتكر قصصهم وكلامهم وعشان كده بشكرهم عليها




1\شيرين:عن تدوينةاوهام البنات
                   اد ايه ياشيرى حسيتها قريبة منى ولسه لحد النهاردة معلقه معايا بكل                            تفاصيلها ومش هنسى انها اول ماقريت على فكرة
2\غادة عبد العال: عن كل مدونة عاوزة اتجوز لن انسى يا غادة انك صاحبة فكرة 
                          التدوين بالنسبالى

3\هبة فاروق:بحيكى يا هبه على مدونتك واخص بالذكر تدوينة الناموسة:)
                     مش عاوزة اقولك ياهبه اد ايه معلقه معايا جداااااااا
                      وكمان بهنيكى على مدونة النهاردة بتاعه ادينى عقلك تحفة بجد

4|مدونة باش كاتب:لصاحبها مصطفى متبعاك جيد جدا وحابة اهنيك على تدوينة   
                             نظرة متشائمة  بس اهنيك اكتر واكتر واكتر على تدوينة 
                              The Ugly Truthبجد كانت تحفة


5|الشحات: قصصك روعه بجد وكلها بتنتهى نهاية غير متوقعه باى شكل
                  احلاهم عندى كانت قصة الشاب اللى خطب اكتر من مرة بجد كانت   
                    جميله


6\اسف على الازعاج:دى بقى ماعرفش اقولكم اى عجبنى فيها وايه ماعجبنيش
                             هى كلها على بعضها تحفة وسيمبل جدااااااااا
                              كفايه اقولكم انها حاجة مريحة للاعصاب مدونة من ارق 
                             مايمكن ان جاز التعبير وان شاء الله تفضل كده ديما
                              واتمنى على الله ان صاحبها تيمو يكتب اكتر شوية من كده


لكل دول حبه اقول برافو بجد مجهود اكتر من رائع وموهبة تستحق انها تسيب بصمة

ولكل اصحابى اللى ماذكرتهومش واللى اكيد هيفهموا انى بحترم كتابتهم جدا وبنتظر منهم اجمل ماعندهم ديما احب اقولهم طالما فى بلدنا ناس ده تفكيرها يبقى لسه فيه امل
 
 ولكل اصحابى دول المذكورين وغير المذكورين لكم اجمل الوردات


تحياتى
                                                                     ويجعله عامر

الثلاثاء، 4 يناير 2011

دعوة الى الرغى!!!!!







مش  عارفة والله شبكات المحمول دى ناوية على ايه ومين فينا اللى بيستعبط التانى بالظبط
امبارح بشحن موبايلى لقيت جالى هديه 1000 دقيقه مجانيه لمدة 12 ساعه يوميا لمدة اسبوع
غير عرض الرسايل المجانيه
غير تظام حكاوى اللى اصلا عندى فيه نص اليوم الساعه ببلاش والنص التانى تعتبر ببلاش برده
وطبعا اصحابى شرحه

النهاردة صحبتى استغلت العرض وفضلنا نرغى اكتر من ساعتين  رغى بقى على تفاصيل اليوم

قفلت معاها وهوب حاصلى فلاش باك بالذاكرة لورا
ايام الكليه
ايام ماكان الموبايل ده امنية لا ينالها اى حد يعنى

كان احدث موديل منه مش فاكرة رقمه بس فكرة النيك نيم بتاعه"فردة الشبشب"
وااااو يعنى لو كان حد معاه الموبايل ده سواء كان بانتنه ولا من غير

فاكرة كويس اول حد شفته ماسك موبايل كان يسمع من ودنه ويجى يتكلم يحط على بؤه
اينعم ده كان غلط طبعا ومضحك جدا بس كان بيحصل 

فاكرة كويس اول عدة جاتلى كنت فى بكالوريوس وبابا فرحان انى طلعت من 3 صيدلة صافى"مش عاوزة تريقه كل خريجى صيدله عارفين 3 صعبه ازاى"كانت 3310 كانت كحلى وب2000 جنييييييه وكان الخط ايامهاب220 جنيه

فاكرة كويس ان الدقيقه كانت ب 1,50قرش وكان اخرنا رنات
رنة علشان المحاضرة ورنه علشان السكشن ورنة علشان احنا فى الكافيتريا ......الخ
ويويله يا سواد ليله اللى يفتح فى الرنة دة يعنى طلبه والكارت ب10جنييييه

فاكرة كويس لما كان فى الموبايل مؤلف نغمات وكنا ناخد الكود من بعض ونظبط الاجهزة
اييييييييييييييه.....................ذكريات

فكرة كويس اوى لما الموبايل ده اتباع جاب 50 جنيه!!!!!!!!!!!يا بلاش

ارجع للواقع بقى الاقى الكلام كتر وبقى ببلاش والموبايل مالوش كبير حاليا مافيش حد ماشى من غيره

تفتكروا ده كويس ؟ظاهرة صحية يعنى؟ولا نشغل نظرية المؤامرة؟؟؟؟؟؟؟؟؟؟
تفتكروا الشركات بقى عندها كرم حاتمى؟؟
تفتكروا لازم نشغل دماغنا فى الحكاية دى اصلا ولا نتكلم وخلاص وبلاش نبقى من اللى بيتقال عليهم هو لاكده عاجب ولا كده عاااااااااجب
  

السبت، 1 يناير 2011

خليك ادها

وحشتونى جدا ووحشتنى الفضفضه معاكم
كل سنة وانتم كلكم طيبين وسنة سعيدة عليكم يارب

ماعرفش ليه يا جماعه انا مقلقه من السنة دى واوعوا تقولولى بطلى تشاؤم

انا عمرى ماكنت متشائمة على فكرة بس بدايتها  كانت رخمه معايا على المستوى الشخصى وهبقوا اقلكم ليه بعدين بس ابقوا فكرونى

وعلى المستوى العام كانت بداية اكتر من حزينة بعد تفجيرات الكنيسة

كلنا متابعين الاخبار طبعا وعارفين ردود الفعل بين المستاء والغاضب واللى مشيا الدولة الذنب واللى مشيل الناس الذنب واللى مشيل امريكا واسرائيل والقاعده الذنب

كل واحد وتفكيره وطريقه تعبيره عن غضبه

بس اللى يغيظ بقى انى دخلت اتفرج على اليو تيوب طبعا انتم اخدتم فكرة عنى انى متصفحة جيدة له

لقيت كليب بينقل وقائع الصلاة فى الكنيسة وقت الاعتداء الكليب اتعرض فى قنوات كتير عموما
ده لينكه
http://www.youtube.com/watch?v=ilBjjlOJuV8

الكليب طبعا حزين بس اللى يتعب اكتر ويحزن بجد التعليقات اللى جايه عليه

اى كميه الاستخفاف بالمشاعر دى!
اى كميه عدم المبالاه دى!
اى كميه الغباء فى التعامل مع الموقف وعدم الاحساس بيه دى!

حريه التعبير عن الرأي موجودة لكن مصحوبه ديما لمقوله انت حر مالم تضر

واللى بيكتب تعليقات زى دى لازم يعرف ان فيه ناس مترصده بالمواقع وهدفها كله نشرالاراء دى وتصويرها كاراء عامة الشعب المصرى


عندما تكتب انا مسلم فى اى موضوع بتقول فيه رائيك لازم تاخد بالك ان مايلى تلك العبارة لابد ان يليق بك كمسلم


انا مسلمة وضد اى عمل ارهابى يستهدف اى انسان ايا كانت ملته وايا كانت عقدته وايا كانت جنسيته واى كان رائيه فى كمسلمة وايا كان حجم خطئه فى وفى عقيدتى


هكذا علمنا نبينا محمد وهكذا تقول عقيدتى


 فعلى كل مسلم  ان يكون اد الكلمة دى